әскери қимылдар театры

(Театр военных действий)

Қарулы Күштердің (құрлықтағы әскер, авиация, әскери-теңіз флоты, т.б.) стратегиялық тобы орналасқан және стратегиялық масштабта соғыс қимылдары жасалуы мүмкін құрлықтың аумақты бөлігі мен онымен шектесетін теңіз немесе мұхит (жақын аралдарды қоса алғанда), сондай-ақ әуе кеңістігі. Ә.қ.т-ның шекарасы мен құрамын сол мемлекеттің (одақтас мемлекеттердің) әскери-саяси басшылығы белгілейді. Мыс., АҚШ пен НАТО елдері Батыс Еуропаны 3 Ә.қ.т.-на (Солтүстік Еуропалық, Орталық Еуропа, Оңтүстік Еуропалық) бөледі. Тарихи жағдайларға байланысты 4 мұхит (Атлант, Тынық, Үнді, Солтүстік Мұзды мұхит) жеке-жеке Ә.қ.т-на жатады. Әрбір Ә.қ.т. белгілі бір әскери-саяси, әскери-экономикалық, физикалық-географиялық және этнографиялық жағдайларға байланысты құрылады және әскери дайындықтар мен соғыс қимылдарын жүргізу үшін инженерлік құралдармен жабдықталады.